Pontón ve no 29-N unha oportunidade para Galicia e Besteiro di que sae para gañar

A líder do BNG, Ana Pontón, admitiu que nos comicios xerais “xogamos moito como galegos e galegas” e considera que o adianto das eleccións xerais ao domingo 29 de novembro supón unha “oportunidade para dar a Galicia máis forza en Madrid”.

A nacionalista reivindicou os logros que o BNG conseguiu para Galicia fronte a unha “dereita rabiosa”, e puxo como exemplo as rebaixas nas autoestradas AP-9 e AP-53 ou a proposta para a condonación da débeda.

Por iso, insistiu na relevancia que ten para Galicia que o BNG consiga máis representación nas Cortes, xa que así se poderá contribuír a que “haxa avances para Galicia” xunto a “avances para a maioría social”.

O BNG citará este mesmo luns á súa Executiva para iniciar o proceso de elaboración das candidaturas e programas coas que concorrerán ao 29-N. Considera que tanto Néstor Rego, actual deputado no Congreso, como Carme da Silva, senadora por designación autonómica, terán un “papel relevante nas candidaturas”.  Con todo, insiste, é unha decisión que lle corresponde ao conxunto do BNG”.

Besteiro aplaude a convocatoria electoral e subliña: "Elixiremos entre dereita ou dereitos"

O líder do PSdeG, José Ramón Gómez Besteiro, aplaudiu este luns o adianto das eleccións xerais ao domingo 29 de novembro e considerou que na cita coas urnas haberá que "elixir entr

O dirixente socialista puxo o foco no papel que xogará o dereito á vivenda durante a campaña electoral e fixo fincapé na importancia que terá Galicia nesta cuestión dado que o candidato do PP a nivel estatal, Alberto Núñez Feijóo, poderá explicar que durante os 13 anos que estivo a fronte do Goberno da Xunta "non fixo absolutamente nada".

Neste sentido, insistiu en que os comicios servirán para que a cidadanía elixa entre “dous modelos: dereita ou dereitos"; entre quen defende o acceso á vivenda ou quen ve o que debería ser “o quinto piar do estado de benestar” como un “negocio”.

Por iso, para o líder dos socialistas galegos, as eleccións deben servir para “dar unha verdadeira portada política á dereita e extrema dereita” e permitir que un goberno progresista dea verdadeiras respostas ás necesidades dos cidadáns.

Nas últimas eleccións xerais, Besteiro foi o candidato pola provincia de Lugo aínda que abandonou o seu posto no Congreso tras as eleccións autonómicas de 2024.