A investigación e as autopsias dos tres falecidos de Taboadela esclarecerán se morreron polos gases dun xerador
A investigación e as autopsias dos tres falecidos de Taboadela esclarecerán se morreron polos gases dun xerador
Segundo os servizos de emerxencias o grupo electróxeno estaba no soto da vivenda familiar, e había grandes cantidades de monóxido de carbono no interior da casa
Era unha familia moi coñecida e querida por toda a veciñanza, o home fora electricista e en tempos xuíz de paz
Francisco Dacal de 81 anos era un home moi querido e coñecido en Taboadela, e tamén a súa familia, a súa muller de 81 anos e o seu fillo de 56. Os tres faleceron na súa vivenda, na noite do corte eléctrico histórico. A Garda Civil investiga que aconteceu exactamente, pero xa se poden considerar vítimas colaterais da falta de luz. Veciños e amigos lamentan a traxedia.
"Este home era boísimo, este era malo para el, do demais, mellor non o había. Porque era electricista e se lle facía falta calquera cousa ía onda el e non tiña un non para ninguén", asegura Berardo Vila, veciño e amigo de Francisco e a súa familia".
"Pola tarde (o xerador), estaba fóra, pero despois á noite co medo de que se por se acaso llo roubaban, metérono dentro", explica Bernardo.
"Trouxéronllo e dixeron que tiñan a porta cerrada, e morreron os tres"di apenada outra veciña de Taboadela.
"Se o deixaran fóra ao mellor non houbera pasado o que pasou. Do baixo cara arriba ten unhas escaleiriñas, esa porta debeu quedar aberta ou algo pasou e veu o que veu", lamenta Berardo.
