A investigación apunta que o Alvia chocou con dous vagóns do Iryo que descarrilaran

O expediente aberto pola Comisión de Investigación de Accidentes Ferroviarios (CIAF) tras o accidente ferroviario de Adamuz detalla que, segundo as primeiras pescudas, os dous últimos vagóns do tren Iryo descarrilaron na entrada da estación de Adamuz e invadiron a vía paralela, o que produciu a colisión co tren Renfe Alvia, que circulaba en sentido contrario.

A CIAF abriu xa o expediente sobre este suceso no que detalla que faleceron 39 persoas e que hai 152 feridos, 123 deles leves e 29 graves.

Explica que tras o descarrilamento do Iryo que viaxaba desde Málaga a Madrid e a invasión da vía contraria, a cabeza do Alvia, que circulaba en sentido contrario (de Madrid a Huelva), chocou cos vagóns descarrilados ás 19:45, caendo os dous primeiros vagóns deste por un terraplén de catro metros contiguo á vía.

Un equipo investigador da CIAF atópase desprazado no lugar do accidente desde a mesma noite do suceso.

Ademais, no expediente explícase que esta información non é definitiva e podería ser obxecto de actualizacións.

Sempre que non prexudique a investigación, as vítimas e os seus familiares, ademais de representantes de traballadores ou propietarios de bens danados, entre outros, dispoñen de 21 días naturais para rexistrarse como tales e poder ter acceso a información relativa sobre os feitos acaecidos e as investigacións efectuadas.

Para iso, poden encher un formulario localizado no propio expediente, ao que se pode acudir a través da páxina web de Transportes.