A intervención dunha muller pon en fuga unha parella que intentaba roubar na Coruña

Os cristaleiros traballaban esta mañá do luns nun apaño de urxencia no escaparate desta rúa do centro da Coruña roto nun intento de roubo a madrugada do domingo.

"Viu dúas persoas aquí na esquina cando se asomou á ventá tras o estrondo do escaparate e unha dicíalle á outra de ir como que os pillaran", di Ferdy Torrealba, deseñador e dono da tenda.

Segundo o testemuño da veciña, os autores, un home e unha muller, fuxiron en dirección á rúa Orzán. Ferdy queixábase este luns do prexuízo que lle ocasionaron cando está en vésperas dun evento conmemorativo do aniversario da súa actividade de deseño e comercialización de roupa.

"Amólame bastante, porque o sábado teño un evento e o negocio perde visibilidade co escaparate estragado. A policía tomoume declaración para poder reclamar ao seguro e demais xestións administrativas", explica Torrealba.

Tamén critica a actitude que observou en policía e cidadáns nos momentos inmediatos ao intento de roubo.

"Cando estaba a recoller os cristais de madrugada, si que pasara a Policía Local e balizou con cinta, pero eu podía estar desvalixando o local cando pasou unha patrulla da Policía Nacional e nin se decatou a xente que pasa pola rúa nin che di nada", di o dono do establecemento.

Noutro negocio coruñés, situado en Catro Camiños, utilizaron un método similar para roubar e neste caso, ao parecer, si que o lograron.