A inflación modérase dúas décimas en abril ata o 3,2 % pola baixada da electricidade

A taxa anual da inflación moderouse dúas décimas en abril, ata o 3,2 %, segundo o avance do Índice de Prezos de Consumo (IPC) publicado este mércores polo Instituto Nacional de Estatística (INE).

A evolución da taxa reflicte un descenso dos prezos da electricidade e unha suba dos carburantes amortecida polas rebaixas fiscais aprobadas polo Goberno en marzo sobre a luz, o gas e os combustibles para facer fronte ao encarecemento enerxético debido á guerra en Oriente Medio.

Os carburantes son os que máis apertan á alza, segundo o Goberno

Segundo avanza o INE, en abril os prezos da electricidade diminuíron máis que no mesmo mes de 2025 e tamén se moderaron os prezos dos paquetes turísticos, mentres que subiron combustibles e lubricantes para vehículos privados.

A inflación subxacente -sen alimentos non elaborados nin produtos enerxéticos- caeu unha décima, ata o 2,8 %, mentres que en taxa mensual, os prezos subiron un 0,4 % respecto ao mes de marzo.

En canto ao indicador harmonizado (IPCH), aumentou unha décima, ata o 3,5 %.

O Ministerio de Economía atribúe a moderación de abril, principalmente, á baixada da factura da luz.

Mentres, os carburantes seguen sendo o produto que máis aperta á alza, reflexo da persistencia do choque externo derivado da guerra en Irán.

As rebaixas fiscais, a clave da moderación

Segundo o Executivo, o seu impacto viuse compensado polas medidas fiscais aprobadas en marzo, que inclúen unha baixada do IVE dos carburantes ao 10 % e do imposto especial de hidrocarburos ata o mínimo que permite a Unión Europea, o cal supoñerá un aforro de ata 30 céntimos por litro, uns 20 euros por depósito por coche medio.

Tamén se reduciron os impostos da electricidade: o IVE pasa do tipo xeral ao reducido (10 %), suspéndese o imposto de produción de enerxía eléctrica -do 7 %, que pagan as empresas- e redúcese o imposto especial de electricidade, que pasa do 5,11 % ao 0,5 %.

Ademais, o IVE do gas natural, os pellets e a leña baixaron ao 10 %, á vez que se conxelan os prezos do butano e o propano e se bonifican nun 80 % as peaxes eléctricas para as industrias máis expostas.

"O plan de resposta aprobado no Congreso e en vigor desde o 20 de marzo está a cumprir o seu obxectivo principal: que o choque externo da guerra non se traslade de forma permanente nin á inflación nin ao poder adquisitivo dos fogares", segundo Economía.