A gran maioría de centros adheridos a E-Dixgal combinarán libros en papel e dixitais

O 84 % dos centros de ensino galegos adheridos ao programa de educación dixital E-Dixgal da Xunta de Galicia seguirán este curso un modelo híbrido no que se combinará o uso de ferramentas informáticas con libros de texto en papel.

Así o indicou este martes o conselleiro de Educación, Román Rodríguez, durante un acto no que presentou as novidades da actualización deste programa, que se empregará en 597 centros da comunidade autónoma, dezaseis menos que no curso anterior, e chegará a uns 61.000 estudantes.

Son varios miles menos que os alcanzados no momento de máxima implantación deste sistema, que nos últimos anos espertou certa contestación na súa contra polas reticencias dalgunhas asociacións de familiares e docentes a utilizar unicamente ferramentas dixitais.

Deste xeito, tan só un dezaseis por cento do total de adscritos seguirá un modelo sen libros de texto e a maioría de centros compaxinará as pantallas dixitais con ata tres manuais en formato físico.

É o límite que marcou a Xunta para un modelo híbrido co que, segundo o conselleiro, buscan fomentar a adquisición de "competencias dixitais" á vez que se manteñen os beneficios do papel.

"É un paso que tenta mesturar o mellor de ambos os mundos e dar solucións", sostivo Rodríguez sobre esta actualización de E-Dixgal durante unha intervención en que se opuxo a abandonar por completo o formato dixital, por entender que é un "deber moral do sistema educativo" garantir esta formación.

Dous de cada tres dos centros adscritos de educación primaria, onde E-Dixgal opera en quinto e sexto curso, optaron por utilizar o máximo permitido de tres libros; mentres que en secundaria, onde xa se compaxinaban os formatos dixitais e físicos, máis do setenta por cento dos institutos opta por empregar dous libros en papel.

As materias máis escollidas para o uso de materiais físicos son as de lingua e literatura en ambas as etapas educativas, aínda que no caso de primaria a opción máis escollida é a de matemáticas, seleccionada en 245 centros diferentes.

Para asegurar o acceso do alumnado a estes materiais, a Consellería de Educación investiu preto de dous millóns de euros na adquisición de máis de 47.500 libros de préstamos que chegarán a máis de 36.000 alumnos de entre os de menor renda.