A Garda Civil desartella en Pontevedra unha trama de estafa con vehículos industriais

A Garda Civil desartellou en Pontevedra unha trama empresarial dedicada a defraudar grandes cantidades de diñeiro mediante contratos de arrendamento de vehículos industriais. Dous empresarios foron detidos en Pontevedra e Vigo no marco deste operativo, denominado Catipalpo, mentres que un terceiro, administrador de varias empresas en Poio (Pontevedra), quedou en calidade de investigado.

Os axentes lograron recuperar unha importante frota de vehículos, que segundo os cálculos dos investigadores está valorada en máis de 1.500.000 euros. Esta investigación permitiu destapar unha complexa trama societaria asentadaentre Barcelona, Pontevedra e Vigo, que utilizaba empresas pantalla para obter vehículos mediante contratos financeiros fraudulentos. Deixaban de aboar as cotas mentres continuaban sendo explotados pola empresa.

A investigación comezou en outubro de 2025 cando unha patrulla da Garda Civil interceptou en Sanxenxo (Pontevedra) un vehículo que figuraba como roubado en Madrid. Nos días posteriores localizáronse outros vehículos denunciados en circunstancias similares, entre eles un vehículo alta gama e varias furgonetas achadas nunha nave situada nos arredores de Pontevedra, vinculada a unha empresa de construción con sede en Vigo.

Pouco despois, en Tui, a Garda Civil interveu outro camión que tamén fora denunciado como roubado. Os investigadores comprobaron que detrás de todos estes feitos existía unha trama fraudulenta perfectamente organizada. Así, durante o primeiro trimestre de 2026 foron localizados e intervidos outros catorce camións e remolques distribuídos entre Pontevedra e Murcia, elevando o valor total recuperado a máis de 1,5 millóns de euros.

A investigación revelou a existencia de contratos presuntamente falsificados, firmas que non coincidían cos seus titulares reais, domicilios ficticios e cláusulas incumpridas de forma sistemática. Ademais, as empresas implicadas utilizarían sociedades sen actividade real para operar na marxe da legalidade e ocultar o verdadeiro destino dos vehículos e apareceron conexións destas empresas con casos de quebra de varias empresas de conxelados.

O principal investigado, que foi arrestado en Pontevedra, é un empresario vinculado ás sociedades radicadas en Barcelona e Pontevedra. Simultaneamente, en Vigo, foi detido o representante da empresa de construción e en Poio o terceiro investigado, o administrador de varias empresas relacionadas coa trama.

Os axentes rexistraron ademais a sede da empresa construtora, en Vigo, e un domicilio dun dos investigados en Pontevedra, onde interviñeron abundante documentación física e dixital considerada clave para o avance da investigación.

A investigación foi desenvolvida polo grupo de patrimonio da unidade orgánica de Policía Xudicial da Garda Civil de Pontevedra, co apoio do grupo GIAT do Subsector de Tráfico de Pontevedra As dilixencias, que leva o titular da praza 9 da sección de instrución do Tribunal de Instancia de Barcelona, continúan abertas.