A Flotilla regresa a Barcelona polo mal tempo e estuda cando volver partir a Gaza

A vintena de barcos da Global Sumud Flotilla ou Flotilla da Liberdade que partiron onte domingo do Porto de Barcelona cara a Gaza con axuda humanitaria regresaron esta madrugada polo mal tempo e os seus capitáns atópanse reunidos este luns para decidir cando volver partir.

A tormenta que descargou sobre o litoral catalán colleu en alta mar á flotilla e tomouse, por seguridade, a decisión de regresar ao porto de Barcelona, en concreto ao peirao da Marina, onde pasaron a noite e esta mañá están a celebrar unha reunión para decidir como e cando volver partir, explicaron fontes próximas á flotilla.

As embarcacións da Global Sumud Flotilla partiron de Barcelona ás 15:00 horas de onte domingo entre berros de "Palestina libre".

Un dos barcos está capitaneado polo concelleiro de ERC no Concello Barcelona Jordi Coroas, e este luns o presidente do partido, Oriol Junqueras, explicou que o vento da Tramuntana que sopraba no Golfo de León e na costa catalá complicaba moito a navegación, polo que se decidiu regresar a porto e esperar a que mellorasen as condicións meteorolóxicas.

Entre as 300 persoas que se enrolaron nesta misión humanitaria atópase a activista sueca Greta Thunberg, quen apelou á "resistencia" da cidadanía ante o "fracaso" dos gobernos co "xenocidio" perpetrado por Israel en Gaza.

Tamén participa na expedición a exalcaldesa de Barcelona Ada Colau, quen lembrou que a capital catalá foi "a primeira cidade europea en romper relacións con Israel".

"Imos esixir que isto se concrete en todas as institucións, en todos os gobernos europeos", comprometeuse.

A propia Thunberg anunciou a flotilla o pasado 10 de agosto como "o maior intento de romper o asedio ilegal israelí sobre Gaza", con "ducias" de embarcacións que, o 4 de setembro, confluirán con barcos saídos doutras zonas do Mediterráneo, como Italia ou Tunes.

Desde entón, a Global Sumud Flotilla, que conta coa participación de 44 países, recibiu mostras de apoio do activismo social de toda España, así como de actores e actrices de renome internacional, como a estadounidense Susan Sarandon ou o irlandés Liam Cunningham, presente no Moll da Fusta.

Xunto ao actor español Eduard Fernàndez, Cunningham fixo público a mensaxe póstuma gravada por unha nena palestina de 5 anos que daba detalles da música que quería que soase no seu funeral se resultaba morta.