A Fiscalía Europea investiga se se malversaron fondos comunitarios para as obras das vías de Adamuz

A Fiscalía Europea abriu unha investigación para analizar se nas obras das vías de Adamuz (Córdoba), onde o pasado domingo 18 de xaneiro ocorreu o accidente ferroviario que terminou coa vida de 46 persoas, se puideron malversar fondos dos 111 millóns de euros que concedeu a Comisión Europea para renovar o tramo Madrid-Sevilla.

O organismo indaga nun posible desvío de diñeiro da UE no marco das tarefas de conservación da vía.  

A investigación corresponde a fondos utilizados para o "mantemento do tramo de vía férrea próximo ao quilómetro 318,7 e á localidade de Adamuz (Córdoba, España), na liña de alta velocidade (AVE) que conecta Madrid e Sevilla", anunciou este venres nun comunicado a EPPO, que se encarga de investigar, enxuizar e xulgar os delitos contra os intereses financeiros da UE.

A Fiscalía explica que esta "confirmación excepcional" prodúcese "tras o grande interese público" que suscitou o caso, e añadia que "non se farán públicos máis detalles polo momento".

Nun oficio pedíase identificar nun prazo de 15 días todos os contratos subscritos e os correspondentes expedientes en relación co tramo da rede ferroviaria onde tivo lugar o accidente de Adamuz.

A Comisión Europea outorgou en xuño de 2024 unha subvención de 111 millóns de euros procedentes dos fondos europeos para renovar este eixo, inaugurado en 1992. O Executivo comunitario afirmaba xa en 2023 que “dados os últimos avances tecnolóxicos” a liña quedara “desfasada en comparanza co resto da rede de alta velocidade española”.  

Segundo adiantou El Mundo e confirmaron a EFE fontes xurídicas, as pescudas tratan de determinar se no uso deses fondos houbo un delito de malversación de fondos públicos e de defraudación de axudas europeas. A Cadena Ser indica que se investiga en concreto se houbo malversación nos máis de 100 millóns de euros en fondos FEDER destinados a esas obras.

As mesmas fontes explicaron que a decisión de abrir a investigación produciuse tras un período de verificación para constatar o emprego dos fondos europeos nesas obras e a posibilidade que houbese un uso fraudulento dos mesmos.

Actualmente, o encargado da investigación das causas do accidente é o maxistrado da Audiencia Nacional José Luis Calama, que foi designado xuíz de garantías nas pescudas, o que supón que será o encargado de supervisar o cumprimento dos dereitos das partes nesta investigación da EPPO, que se atopa na súa fase inicial.

Esta mesma semana fíxose público un informe técnico incluído no borrador da investigación da Comisión de Investigación de Accidentes Ferroviarios (CIAF) no que se reforza a hipótese da rotura da vía como causa do descarrilamento dos trens implicados, un tren de alta velocidade Iryo con máis de 300 pasaxeiros a bordo, e un Alvia con preto de 200.

Este documento remitido á CIAF por parte da empresa Hitachi, que se encarga do sistema de sinalización, pon de manifesto unha "caída de tensión no circuíto de vía" unhas 22 horas antes do suceso, algo compatible cunha rotura da vía, principal hipótese dos investigadores sobre a causa do sinistro. 

O Goberno afirma que a xustificación de fondos UE a obra de Adamuz se fixo con "absoluta normalidade"

O Ministerio de Transportes e Mobilidade Sostible asegurou este venres que a xustificación dos fondos europeos concedidos á obra de mantemento do tramo de alta velocidade que une Madrid-Sevilla e pasa por Adamuz (Córdoba) fíxose "con absoluta normalidade a medida que se executaba".

Desde o Ministerio subliñaron a súa colaboración coa Fiscalía Europea na información que vaia solicitando, como xa está a facer o administrador da infraestrutura ferroviaria Adif. Así mesmo, indicaron que é normal que revise a documentación.

O ministro de Transportes, Óscar Puente indicou na rede social X que a Fiscalía Europea investiga o accidente de Adamuz desde nada máis producirse e engadiu que en todos os casos nos que hai involucrados fondos europeos sucede así.

"Pola razón que sexa, cóntase hoxe como unha novidade importante. Non o é", subliñou o ministro.