A familia de Yoel Quispe pide penas máximas para os tres acusados do seu asasinato

A familia de Yoel Quispe, o mozo coruñés de 22 anos asasinado na madrugada do 24 de decembro de 2023 no centro da cidade, pide as penas máximas para tres homes implicados na súa morte.

A acusación particular solicita entre 15 e 25 anos de prisión por un delito de asasinato, fronte aos 14 anos que propón a Fiscalía para un só acusado, ao considerar os feitos como homicidio.

Segundo o escrito do avogado da familia, Adrián Borrajo, o autor material da coitelada que matou a Yoel merece 25 anos de cárcere e 10 anos de liberdade vixiada, ao actuar con aleivosía e aproveitarse do estado físico e anímico da vítima, que non podía defenderse.

Outro dos acusados, considerado cooperador necesario, tamén se enfronta a 25 anos de prisión e 10 de liberdade vixiada por entregar de maneira deliberada a arma ao agresor.

O terceiro, acusado como cómplice, estaba presente durante a pelexa e desfíxose da navalla, segundo a acusación. Para el piden 15 anos de cárcere e 10 de liberdade vixiada.

Actuación conxunta e violenta

A acusación particular sostén que os tres homes actuaron "de forma conxunta e coordinada".

Dous testemuños coinciden en que, na esquina entre as rúas Juan Flórez e Sinfónica de Galicia, un grupo de sete ou oito persoas agredía Yoel repetidamente.

O conflito comezou cun enfrontamento entre Yoel e un integrante doutro grupo, pero logo ampliouse coa intervención activa e violenta dos tres acusados, segundo o relato da acusación, que insiste en que o que podería ser unha mediación rematou en agresión.

Ademais deste procedemento, hai outra causa aberta por un suposto delito de lesións contra dous membros do primeiro grupo agresor.