A DXT inicia unha campaña especial de vixilancia do transporte escolar
Galicia é a comunidade con máis rutas escolares de España, con 3.800 liñas activas
O ano pasado controlaron un total de 400 vehículos e formularon 488 denuncias
O 90% dos accidentes nestes autobuses teñen lugar ao subir ou baixar do vehículo
Realizaranse controis de carácter administrativo sobre as autorizacións e documentos que deben ter os vehículos para a correcta prestación do servizo.
Tamén se verificarán as condicións técnicas e os elementos de seguridade, así como os requisitos especiais que debe cumprir o condutor, entre eles os tempos de descanso.
Estes autobuses teñen estipulada unha antigüidade máxima, deben contar cun seguro de responsabilidade civil ilimitado e levar o sinal de transporte escolar.
Seguridade e menores
De acordo coas estatísticas da DXT, o 90% dos accidentes que se producen durante o transporte escolar teñen lugar no momento de subir ou baixar do vehículo, ou xusto nos instantes inmediatos.
En moitos casos, son atropelos causados por unha distracción do menor, do condutor ou dos acompañantes. Segundo Tráfico, unha gran parte dos sinistros con lesións graves están relacionadas coa ausencia do uso adecuado dos cintos de seguridade.
Resultado da campaña anterior
Durante os cinco días que durou a mesma campaña en novembro do pasado ano, controlaron 400 vehículos dos cales, o 59,5% (238 vehículos) foi sancionado cun total de 488 denuncias formuladas.
O groso das infraccións foron irregularidades administrativas, entre elas, 136 por non dispoñer da autorización especial para este transporte e 87 por non ter subscrito un seguro de responsabilidade ilimitada ou non levalo a bordo.
Doutra banda, un dos condutores controlados durante a campaña deu positivo no control de drogas. Ademais, 26 foron sancionados por carecer de sinal de transporte escolar.
