A directora da Garda Civil declara sentirse vítima de Cerdán e de Leire Díez
Mercedes González recoñece que se viu en dúas ocasións con Leire Díez pero nega ter colaborado con ela para frear procedementos xudiciais
O DAO da Garda Civil defende a súa inocencia e di que non dimitirá aínda que o leven a xuízo
A directora da Garda Civil Mercedes González, na Audiencia Nacional, a onde acudiu de novo para declarar como imputada no caso Leire (EFE/ Mariscal)
A directora xeral da Garda Civil Mercedes González afirmou ante o xuíz da Audiencia Nacional Santiago Pedraz sentirse vítima do exsecretario de Organización do PSOE Santos Cerdán e da trama de Leire Díez.
Asegura que ambos a utilizaron ou trataron de implicala sen que ela coñecese o verdadeiro alcance das súas actuacións. Na súa declaración como imputada, que se prolongou algo máis de hora e media, González negou que colaborase con ningunha cloaca nin ter participado en manobras para frear procedementos xudiciais sensibles para o PSOE, o Goberno ou a contorna de Pedro Sánchez.
Como xa fixo na Comisión de Interior do Senado, declarou que se viu en dúas ocasións con Díez, nas que esta se presentou como xornalista freelance, pero negou unha terceira que a UCO si plasmou nun dos seus informes, segundo as mesmas fontes.
Dixo que, de ter sabido que a exmilitante socialista se reuniu con ela a instancias do exsecretario de organización do PSOE nunca a tería recibido.
González estaba citada para este xoves, pero o xuíz pospuxo o seu interrogatorio debido á extensión da declaración do director adxunto operativo (DAO) do corpo, Manuel Llamas.
O xuíz atribúelle a ela e a Llamas a presunta autoría de delitos de prevaricación e obstrución á xustiza, despois de que tanto a Fiscalía Anticorrupción como as acusacións populares lideradas polo PP solicitasen as súas imputacións.
