A concesionaria da AP-9 pecha o semestre con 45,9 millóns de beneficio, un 3,1 % máis
Audasa cifra o uso da autoestrada en 26.833 vehículos diarios, o que supón un 3,15 % máis
A concesionaria da autoestrada AP-9, Audasa, pechou o primeiro semestre de 2026 con 45,9 millóns de euros de beneficio neto, o que supón un 3,1 % máis ca hai un ano, segundo trasladou a compañía á Comisión Nacional do Mercado de Valores e nun comunicado.
Audasa rexistrou un crecemento continuado no uso da infraestrutura ata alcanzar os 61 millóns de viaxes cunha intensidade media diaria (IMD) de 26.833 vehículos, o que supón un 3,15 % máis.
A evolución do tránsito de vehículos pola autoestrada que vertebra Galicia de norte a sur traduciuse nun volume de negocio de 108 millóns de euros (+0,86 %) e un beneficio neto de 45,9 millóns de euros (+3,1 %).
O 81 % dos condutores fixo uso da telepeaxe (Vía-T) e os usuarios aforraron máis de 43,8 millóns de euros a través das bonificacións públicas (31,7 millóns), o desconto comercial propio do 25 % aplicado pola empresa (5,5 millóns) e as peaxes en sombra (6 millóns).
A empresa mantén un contencioso coa Administración Xeral do Estado tras interpoñer un recurso ante o Tribunal Supremo para reclamar a cobranza do 50 % das peaxes en sombra das anualidades 2020 a 2024 máis intereses.
Redución dos accidentes por irrupción de xabarís
A concesionaria informou dunha redución do 60 % os accidentes con danos privados por irrupción de xabaríns despois de implementar barreiras intelixentes e sistemas de cámaras en ligazóns crave como A Barcala ou Santa Marta, na Coruña.
Ademais, impulsou a transición ecolóxica mediante a posta en marcha dos seus primeiros 16 puntos de carga ultrarrápida para vehículos eléctricos dun total de 74 previstos no corredor da AP-9.
