A Comisión Europea autoriza a vacina de BioNTech para subvariantes da covid
Está destinada a persoas maiores de 12 anos que xa recibiran a pauta primaria contra a enfermidade
A Comisión Europea autorizou este luns a comercialización da vacina desenvolvida polo laboratorio BioNTech e a farmacéutica Pfizer adaptada ás subvariantes BA.4 e BA.5 de ómicron que horas antes foi apoiada pola Axencia Europea do Medicamento (EMA).
A comisaria de Saúde do Executivo comunitario, Stella Kyriakides, confirmou en Twitter este permiso despois de coñecer que o soro conta coa análise positiva da EMA e destacou que a autorización "garantirá que os estados membros serán capaces de despregala rapidamente" para "protexer os cidadáns".
"Sabemos que a covid é aínda unha ameaza. Por iso acabamos de autorizar a dose de reforzo de BioNTech e Pfizer contra as actuais variantes", subliñou a presidenta da Comisión Europea, Ursula von der Leyen.
Von der Leyen remarcou tamén que esta vacina axudará os europeos a "estar seguros este outono" e apuntou que "a vacinación aínda é a mellor forma de protexerse contra a covid-19".
Este preparado está destinado a persoas maiores de 12 anos que xa recibiran a pauta primaria contra a enfermidade, e ten o obxectivo de protexer mellor contra as variantes do SARS-CoV-2 que circulan agora mesmo.
A EMA apoiou o 1 de setembro o uso doutras dúas vacinas adaptadas a novas variantes do SARS-CoV-2 (destinadas a atacar a subvariante ómicron BA.1 e a variante orixinal) desenvolvidas polas farmacéuticas Pfizer e Moderna como reforzo para unha protección máis ampla contra a Covid-19 en persoas maiores de 12 anos.
