A comisión de análise do apagamento celebra este sábado a súa segunda reunión

 A comisión creada polo Goberno para buscar as causas do apagamento do pasado luns ten previsto celebrar este sábado a súa segunda reunión para seguir analizando os datos fornecidos polo operador do sistema, Red Eléctrica, e polas empresas eléctricas.

A reunión terá lugar na sede de Rede Eléctrica. O primeiro encontro, celebrado o mércores pola tarde, desenvolveuse no Ministerio para a Transición Ecolóxica, departamento que lidera a comisión de análise.

A comisión recibiu xa "gran parte" da información reclamada ás empresas do sector eléctrico.

Con todo, "dada a complexidade técnica" para acceder a certos datos, unha parte deles aínda están a ser recompilados polas empresas.

Ademais, a comisión cursou por escrito novas peticións de información dirixidas aos axentes do sector "para completar a reconstrución do incidente".

En concreto, pedíronse detalles sobre as horas previas ao apagamento e sobre o proceso de reposición da subministración.

Red Eléctrica xa completou a entrega de todos os datos que lle solicitaba a comisión, segundo informou este xoves a empresa.

A comisión está integrada por representantes de varios departamentos ministeriais: Presidencia do Goberno (a través do Departamento de Seguridade Nacional), Ministerio de Defensa (a través do CNI e o Estado Maior), Ministerio do Interior (a través do Centro Nacional de Protección de Infraestruturas Críticas e da Oficina de Coordinación Cibernética) e Ministerio de Transformación Dixital (a través de Seguridade Dixital).

Participan tamén organismos como o Instituto Nacional de Ciberseguridade (Incibe) e o Consello de Seguridade Nuclear (CSN).

Ademais, prevese incorporar á Comisión Nacional dos Mercados e a Competencia (CNMC) e mesmo a operadores privados e representantes internacionais.