Alternativa por Alemaña, declarado oficialmente un partido de extrema dereita
Os servizos de intelixencia do país consideran que "a concepción étnica e baseada na ascendencia que prevalece no partido non é compatible coa orde democrática básica"
Tamén cre que "pretende excluír a determinados grupos de poboación da participación igualitaria na sociedade, sometelos a un trato desigual que non se axusta á Constitución"
Alternativa para Alemaña di que a súa cualificación como extremista é un golpe a democracia
Alice Weidel, líder do partido, nunha imaxe de arquivo
En Alemaña, a catro días da toma de posesión do novo Goberno, os servizos de intelixencia do país acaban de clasificar a Alternativa por Alemaña, a segunda forza no Parlamento, como un partido extremista de dereitas, incompatible coa democracia.
O ditame permite aumentar a vixilancia sobre a formación e reaviva as iniciativas para a súa prohibición, que ata agora fracasaron.
Nas eleccións xerais anticipadas, celebradas o pasado 23 de febreiro, AfD foi a segunda forza máis votada, cun 20,8 % dos votos, polo que na nova lexislatura, cuxa actividade parlamentaria comeza a semana que vén, exercerá como principal forza da oposición.
A BfV, tras revisar de forma "exhaustiva e neutral" o informe que ten sobre AfD, dunhas 1.100 páxinas, sinalou nun comunicado que "a concepción étnica e baseada na ascendencia que prevalece no partido non é compatible coa orde democrática básica".
Esa concepción "pretende excluír a determinados grupos de poboación da participación igualitaria na sociedade, sometelos a un trato desigual que non se axusta á Constitución".
Un golpe á democracia
Alternativa cualificou este venres de "duro golpe á democracia" a decisión dos servizos de intelixencia do Ministerio do Interior de considerar a esa formación política como extremista de dereitas na súa totalidade.
Alice Weidel e Tino Chrupalla, os dous líderes do partido, afirmaron nun comunicado que o obxectivo é descualificar e desacreditar a unha formación que é a principal forza da oposición e á que algunhas enquisas sitúan como primeira en intención de voto.
"A decisión de hoxe da Oficina Federal para a Protección da Constitución é un duro golpe á democracia de Alemaña no seu conxunto. Nas actuais enquisas AfD vai na cabeza como primeira forza. Ao Goberno só quédanlle catro días no cargo", salientaron, ao aludir ás sondaxes de intención de voto máis favorables para o partido.
