A Cociña Económica da Coruña celebra o seu 140 aniversario
A institución fai un chamamento á colaboración para seguir prestando axuda aos máis necesitados
Andrea atravesa un complicado momento persoal. Cada día acode á Cociña Económica para resolver as necesidades máis básicas.
"A comida sempre está boa e temos unha zona de descanso. Todos axudan co que poden", di Andrea.
Coma ela, cada día pasan por estas instalacións unhas 2.000 persoas. A maior parte para recoller o xantar para levar á casa.
"Hoxe temos fabada, pizza e un bocadillo", di Chus Gómez, traballadora da Cociña Económica.
Chus leva 34 anos ofrecendo o seu sorriso a cada un dos usuarios que buscan na Cociña Económica un prato, un lugar onde asearse, lavar a roupa ou compartir unhas horas ao quente.
"Cada un ten unha historia. Uns porque non teñen traballo, outros porque non teñen pensión. No teñen para comer", explica esta traballadora.
O perfil dos usuarios foi mudando cos anos.
"É moi variado. Desde parados de longa duración ata familias", conta Óscar Castro, director da Cociña Económica.
A Cociña Económica chama á colaboración. Precisan socios e doazón de roupa e alimentos.
"Renunciar a 5 ou 10 euros ao mes tampouco significa moito. É importante seguir axudándonos desta maneira ou realizando doazóns en especie coma alimentos ou roupa", pide Óscar Castro.
Máis colaboración para seguir soprando as candeas 140 anos despois.
