A científica galega María Antonia Señarís, protagonista do cupón da ONCE deste sábado
Nacida en Santiago, é catedrática de Química inorgánica na Universidade da Coruña
A serie Mulleres con Ciencia, é unha colección de cupóns que se emite ao longo de 2026 e que rende homenaxe a mulleres académicas e científicas de referencia
María Antonia Señarís (primeira pola esquerda) na presentación do cupón na Delegación do Goberno en Galicia. EFE
A investigadora da Universidade da Coruña María Antonia Señarís, catedrática de Química inorgánica, protagonizará o cupón deste sábado de lotería da ONCE dentro da iniciativa Mulleres con Ciencia.
A iniciativa, impulsada pola ONCE e a Real Academia de Ciencias de España é unha colección de cupóns que se emite ao longo de 2026 e que rende homenaxe a mulleres académicas e científicas de referencia.
A quenda de María Antonia Señarís chegará este sábado, 14 de novembro, en representación de Galicia, cunha emisión de 5,5 millóns de exemplares.
O delegado do Goberno en Galicia puxo o foco no labor divulgativo do proxecto, que recoñece o traballo das investigadoras e introdúceo en innumerables fogares españois.
"A igualdade tamén se constrúe facendo visible o talento e recoñecendo o traballo que durante moito tempo non tivo o protagonismo público que merecía", dixo Pedro Blanco.
A colección comezou en xaneiro cun cupón dedicado á química sevillana Rosario Fernández e contempla a emisión de 18 cupóns dedicados a investigadoras salientables de cada comunidade autónoma.
