A cidadanía de Compostela festexa a chegada das estatuas do Mestre Mateo

Música, sorrisos, aplausos e reivindicación da memoria colectiva han marcado este xoves o acto institucional de recepción das dúas estatuas atribuídas ao Mestre Mateo que hai máis de 70 anos Carmen Polo, a muller do ditador Francisco Franco, decidiu levar á súa residencia de verán, o pazo de Meirás, en Sada, e que a cidade de Santiago recuperou tras un longo periplo xudicial.

O acto, no que participaron representantes da sociedade civil compostelá e de numerosas institucións de Galicia, estivo protagonizado polos tres alcaldes que participaron na loita por recuperar as estatuas, que arrincou en 2017, con Martiño Noriega (Compostela Aberta) á fronte, continuou co socialista Xosé Sánchez Bugallo e, tras pasar por varias instancias, xa con Goretti Sanmartín concluíu o verán deste ano 2025, cando o Tribunal Supremo ditaminou que as estatuas eran propiedade do Concello de Santiago e non da familia Franco, como argumentaban os netos do ditador.

Desde este xoves, as dúas estatuas están dispoñibles para a súa visita no á Sur do Museo do Pobo Galego onde permanecerán ata mediados do próximo ano.

A exhibición está composta polas esculturas e por unha liña do tempo sobre historia das pezas e un audiovisual que forma parte do proxecto KosmoTech_1200, da USC e do CISPAC, centrado na reconstrución do coro do Mestre Mateo e do conxunto do nártice do Pórtico da Gloria, incluída a fachada exterior, onde estaban situadas as dúas esculturas.

Así mesmo, o público terá á súa disposición unha folla de sala que inclúe códigos QR para acceder a materiais sobre o proceso creativo do Pórtico da Gloria, o periplo das estatuas ata a súa devolución ao Concello de Santiago e a súa relevancia na cultura galega e europea.