A calor excesiva ocasionou en 2022 a morte de 11.300 persoas en España
O cambio climático está ocasionando unha suba de temperaturas en todo o mundo
Cincuenta e tres graos a mediodía deste sábado no Val da Morte norteamericano. É unha das temperaturas máis altas rexistradas no mundo no que vai de século, nun mes de xullo que vai camiño de bater todas as marcas de temperatura global.
"Nunca experimentara este tipo de calor, vai moitísima calor. Un pode estar fóra dez ou quince minutos, logo tes que buscar o aire fresco do coche", di Patrick, un turista belga que visita o Val da Morte californiano.
Os expertos din que as temperaturas van seguir subindo en todo o mundo
Os científicos din que este incremento de temperaturas, tanto en terra coma nos mares, non ten precedentes. E os expertos da Organización Meteorolóxica Mundial din que as temperaturas poden seguir subindo nos próximos meses.
A calor excesiva ocasionoulle a morte en 2022 a 61.000 persoas en Europa
En Europa, os expertos din que este ano poden superarse os 48,9 graos rexistrados en agosto de 2021 en Sicilia. Os epidemiólogos din que o ano pasado a calor excesiva matou en Europa máis de 61.000 persoas, das que 11.300 eran españolas. Os máis afectados son os maiores con enfermidades crónicas.
"A calor excesiva o que fai é que desestabiliza as súas enfermidades crónicas, a persoas habitualmente con insuficiencia cardíaca, cardiopatía isquémica, con bronquite crónica, con ictus ou con insuficiencia renal", sinala o doutor Angel Abad, especialista en medicina preventiva e saúde pública do Hospital La Paz.
No que vai de ano, en España, a calor excesiva ocasionoulles a morte a 381 persoas, a maior parte delas en Madrid e Andalucía.
