A biofarmacéutica Zendal adquire a totalidade do grupo catalán Maymó

O Grupo Zendal pechou un acordo para a completa adquisición da compañía farmacéutica Laboratorios Maymó, S.A., o que completa un proceso que o grupo galego iniciou en 2022 coa compra do 46 % das accións da empresa catalá.

Desta maneira, Zendal, segundo informa nun comunicado, asume o control efectivo do Grupo Maymó.

Con esta nova actuación empresarial, son xa oito as firmas integradas baixo o paraugas do grupo Zendal, con sede no Porriño.

Segundo Zendal, as súas distintas divisións permítenlle desenvolver diferentes proxectos centrados na investigación, o desenvolvemento e a fabricación de biolóxicos e farmacéuticos tanto en saúde animal como humana, tendo un papel esencial en toda a carteira a vacinoloxía e probióticos, en liña cos avances da ciencia actual.

Maymó conta con 16.000 metros cadrados en Castellbisbal (Barcelona), unha planta na que producen medicamentos para animais de produción en distintas formas farmacéuticas, incluíndo inxectables, solucións orais, nutrición e desinfectantes.

Esta operación permite ao Grupo Zendal consolidar o seu papel como referente na Península Ibérica con plantas de fabricación no Porriño, León e Barcelona, xunto a outra que se abrirá este mesmo ano en Paredes de Coura (Portugal).