Os consumidores e o Goberno denuncian ante a Comisión Europea sete aeroliñas por cobrar a equipaxe de man

A Organización de Consumidores Europeos (BEUC, polas súas siglas en francés) e o ministro español de Dereitos Sociais, Consumo e Axenda 2030, Pablo Bustinduy, anunciaron unha denuncia ante a Comisión Europea e a rede europea de consumidores contra sete aerolíneas polo cobro da equipaxe de man, á vez que reclamaron unha investigación a escala da Unión Europea das prácticas do sector.

"O que o Goberno de España está a tentar facer é protexer a lei, que defende os dereitos dos consumidores", dixo en conferencia de prensa en Bruxelas Bustinduy.

"Tomamos medidas contra sete aerolíneas que están a explotar os consumidores e ignorando o máximo tribunal da UE, que ditaminou que cobrar unha equipaxe de man de tamaño razoable é ilegal", dixo o director xeral da BEUC, Agustín Reyna, nun comunicado para anunciar a acción da organización, que representa agrupacións dunha ducia de países, incluídas Asufin e a CECU.

Reyna pediu, ademais, que se aproveite a revisión do regulamento sobre dereitos dos pasaxeiros aéreos que está en marcha no seo da UE para aclarar "que servizos deben incluírse no prezo básico do billete", tendo en conta de que os viaxeiros dan por feito, di a organización de consumidores, que coa tarifa básica poidan embarcar cun vulto pequeno e unha peza de equipaxe de man.

A acción anunciada este mércores pola BEUC está apoiada tamén por un total de 16 organizacións membro de 12 países e supón unha denuncia ante a Comisión Europea e ante a Rede de Autoridades de Protección ao Consumidor (CPC) contra Easyjet, Norwegian Airlines, Ryanair, Transavia, Volotea, Vueling e Wizzair.

Nunha sentenza de 2014, o Tribunal de Xustiza da UE ditaminou que as compañías non deberían cobrar un suplemento por equipaxe de man, sempre que este cumpra "requisitos razoables en termos de peso e dimensións, e cumpra cos requisitos de seguridade aplicables".

España sancionará a Wizzair e Transavia polas prácticas abusivas

En novembro do pasado ano, o Goberno español multou con 179 millóns de euros a Ryanair, Vueling, Easyjet, Norwegian e Volotea por cobrar suplementos pola equipaxe de man, unha medida que as compañías denunciaron ante a Comisión Europea e que esta a examinar desde xaneiro tras pedir información detallada a España, que xa entregou a documentación solicitada.

Este mércores, Pablo Bustinduy, ministro español de Dereitos Sociais, Consumo e Axenda 2030, avanzou que o Goberno sancionará as aeroliñas Wizzair e Transavia.

O ministro sinalou que a sanción en España é "máis ampla que só a equipaxe de man", pois a multa tamén ten relación coas políticas relacionadas cos asentos para menores acompañados, as persoas con mobilidade reducida ou as tarifas por imprimir a tarxeta de embarque.

Bustinduy declinou mencionar que prazos ou contía que manexa o Ministerio para as novas sancións porque se trata de "procedementos en curso", pero reiterou que o Executivo español actuará da mesma forma contra calquera empresa que incorra nesas prácticas.