A Audiencia Nacional desestima o recurso de Zapatero contra a investigacións das súas contas

O xuíz da Audiencia Nacional que investiga o caso Plus ultra desestimou o recurso que interpuxo José Luis Rodríguez Zapatero contra a autorización que deu á Unidade de Delincuencia Económica e Fiscal da Policía Nacional para investigar contas bancarias tanto del como das súas fillas, Alba e Laura, e da súa secretaria, Gertrudis Alcázar, todos eles imputados na causa.

Así o decidiu Calama nun auto este luns, no que desestima a petición de Zapatero de paralizar a investigación das contas bancarias da súa contorna na causa sobre as presuntas irregularidades co rescate de 53 millóns de euros á aeroliña Plus ultra en pandemia, na que o xuíz sitúa o exdirigente como presunto líder dunha suposta rede de tráfico de influencias.

Zapatero impugnou a decisión do xuíz porque entendía que vulneraría o seu dereito á intimidade e á tutela tutela xudicial efectiva. Pediu que se acoutase o tempo da investigación e que se suprimise a referencia ás comunicacións internas da entidade e co cliente, ao considerar que "non son datos bancarios estritos e afectan o segredo das comunicacións".

Calama desestima estas peticións ao determinar que a expresión de "ampliar a información que se considere pertinente" refírese a "a obtención de datos complementarios ou aclaratorios sobre os mesmos produtos bancarios xa autorizados, non á apertura de novas liñas de investigación nin á solicitude de información allea ao obxecto do proceso".

"A actuación policial queda, por tanto, delimitada polo perímetro fixado na autorización xudicial, que exclúe calquera indagación prospectiva ou desvinculada dos feitos investigados", explica o xuíz instrutor.