A Audiencia de Pontevedra tamén rexeita a petición da familia de Déborah Fernández de que a UCO asuma o caso

A sección segunda da Audiencia Provincial de Pontevedra ditou un auto no que rexeita o recurso de apelación interposto pola familia de Déborah Fernández, e confirma a decisión do xulgado de instrución de Tui, que desestimou apartar á Policía Nacional do caso e encargar a súa investigación á UCO da Garda Civil.

Así, a familia da moza viguesa (desaparecida en abril de 2002 e cuxo cadáver apareceu días despois nunha cuneta no Rosal), pedira ao xulgado que trasladase as dilixencias, levadas a cabo no seu día pola Policía Nacional, á UCO da Garda Civil. Pero o tribunal de Tui rexeitou esa petición, lembrado que é o órgano xurisdiccional o que encomenda á policía xudicial correspondente a práctica de dilixencias, e que a elección do corpo policial non queda "a discreción das partes".

Igualmente, o xulgado de Tui sinalou que o caso está arquivado e non constan indicios nin feitos novos que xustifiquen a súa reapertura. No seu auto, o xulgado confirmaba así unha providencia previa que, igualmente, rexeitara a pretensión da familia.

Agora, foi a Audiencia Provincial de Pontevedra a que, nun auto de xuño pasado, confirmou esa decisión.

Na súa resolución, o tribunal provincial sinala que "non se pode cambiar de corpo policial para que leven a cabo unha especie de inspección ou fiscalización do realizado por outro corpo ou forza de seguridade, ou por distintos axentes do mesmo corpo, co fin de depurar outro tipo de responsabilidades".

Ademais, engade a Audiencia en que non pode "impoñer" ao xulgado de instancia criterios de actuación fóra da estrita resolución de recursos, máxime nun asunto que está sobresido e arquivado. Contra esta resolución non cabe recurso.