A Asociación Galega de Axuda aos Enfermos con Alzhéimer presenta unha guía para axudar os coidadores

Deambulación, agresividade, desinhibición, alteracións no sono. Son algúns dos síntomas do alzhéimer. Recoñecer  estas anomalías, saber onde recorrer, como actuar, e como tratar os enfermos nas distintas fases deste tipo de demencia é o obxectivo da guía que acaba de publicar AGADEA. Unha guía destinada tamén a que os coidadores saiban coidarse, porque o seu benestar é fundamental tamén para o benestar das persoas con esta demencia.

"A paciencia e o humor como os primeiros ingredientes que temos que ter como coidadores para que as persoas afectadas e tamén os coidadores teñan a mellor calidade de vida posible. Ninguén nace aprendido e nunha enfermidade tan complexa é moi necesario ter este tipo de guías", explicou Taida Sánchez, neuropsicóloga de AGADEA.

A guía está dispoñible en Internet e presentouse este luns nestas xornadas, onde os investigadores do CIMUS expuxeron tamén as liñas de traballo que desenvolven para tratar de frear a enfermidade.

 "Nos últimos anos  viuse que a barreira hematoencefálica xoga un papel moi importante en distintas enfermidades dexenarativas, non só na enfermidade e alzhéimer", Dolores Viña, investigadora principal do Grupo de Farmacoloxía de Enfermidades Crónicas do CIMUS, explicou que buscan dianas e fármacos que permitan manter esa estrutura.  

En Galicia hai unhas 70.000 persoas con demencia. O acceso ao diagnóstico precoz a través de técnicas de imaxe e mesmo en analíticas pode mellorar moito o prognóstico. Tamén o acceso a recursos sociosanitarios de estimulación cognitiva.