A asociación Bumei recorre o arquivo da causa da Maruxaina

A asociación Mulleres en Igualdade, Bumei, presentou recurso de apelación ao auto do Xulgado de Viveiro que determinou o arquivo provisional da causa aberta polas gravacións de mulleres ouriñando na vía pública na celebración da festa da Maruxaina no ano 2019, imaxes que foron posteriormente subidas a páxinas de contido erótico.

En declaracións a EFE, a presidenta nacional de Bumei, Mari Fraga, reafirmou que as representantes deste colectivo, “como dixemos desde o principio, imos chegar ata o final”. 

“Non queremos que este caso se arquive porque si”, dixo Mari Fraga, quen insiste na necesidade de que “se sigan as liñas de investigación” abertas para dar cos responsables das gravacións e da súa difusión.

“Queremos que se dea co culpable ou os culpables dos feitos”, dixo a presidenta nacional de Bumei, quen confirmou que o recurso de apelación xa foi presentado polo representante legal deste colectivo.

O Tribunal de Instancia de Viveiro -Praza nº1- acordou o sobresemento provisional da causa aberta tras as denuncias interpostas por varias asistentes á festa A Maruxaina, que tivo lugar os días 10 e 11 de agosto de 2019 en San Cibrao, no municipio lucense de Cervo, por ser gravadas mentres ouriñaban na vía pública, imaxes que foron subidas posteriormente a varias páxinas web de contido erótico.

Dese modo, a xuíza accedeu á petición da Fiscalía, que solicitou o sobresemento “por non haber motivos suficientes para acusar a determinada ou determinadas persoas como autores, cómplices ou encubridores”.

A instrutora subliñaba no auto que non dubida “do testemuño das denunciantes nin do seu sufrimento”, pero tamén lembra que os xuíces son garantes da legalidade e no sistema penal español “rexen os principios de presunción de inocencia e intervención mínima, de forma que, ante a ausencia de indicios racionais e suficientes de criminalidade contra persoas determinadas”, só “cabe o irremediable arquivo das actuacións”.

Na resolución, a xuíza tamén explicaba que “todas as dilixencias practicadas para a identificación” dos “posibles autores dos feitos resultaron infrutuosas, tanto en relación coa captación das imaxes como en relación coa difusión nas distintas páxinas web de contido erótico”.

Sobre a difusión dos vídeos nas distintas páxinas web, explica que, “sendo infrutuoso o intento de que as entidades titulares dos distintos dominios prestasen a súa colaboración para a identificación de quen figurase tras os usuarios”, tramitouse solicitude de asistencia xudicial internacional aos Estados Unidos, pero tampouco deu resultado.