A alerxia aos ácaros é a de maior incidencia en Galicia en outono

O inicio deste outono con tempo máis ben solleiro está a ser unha boa nova para quen padece alerxia. 

A alerxia de maior incidencia nesta época do ano é a provocada por ácaros, que acadan o seu pico reprodutivo a principios de outubro.

"Nesta época é cando chegamos ao 80% ou 90% de humidade e os ácaros aproveitan para reproducirse dentro das vivendas especialmente nos colchóns. Tamén cando removemos a roupa no cambio de roupeiro de verán a inverno aí vai haber moitos ácaros. Tamén nas alfombras. Pero só hai ácaros onde hai humidade", explica Manuel Rial, alergólogo do Complexo Hospitalario Universitario de Ferrol.

É a humidade e non o po o que máis condiciona a aparición de ácaros. En Galicia mesmo existe un ácaro vencellado ao rural. 

"Nas zonas máis rurais, nos pallotes e os sitios onde se alimentan os animais hai un ácaro de almacenamento que se chama Lepidoglyphus destrutor é moi de Galicia e do Cantábrico, non o hai noutras zonas. Este dá uns síntomas un pouco diferentes porque provoca moitos síntomas de ollos. Normalmente os ácaros non dan tanta conxuntivite, pero este ácaro si", argumenta o alergólogo Manuel Rial. 

 Á marxe do tratamento médico que se poida precisar, para aliviar os síntomas este especialista recomenda "facer reformas na casa, ou ter deshumidificadores ou tamén os purificadores de aire".

 A alerxia aos fungos é menos habitual en Galicia dado que amais de humidade precisan de calor.