A afección do Negreira mobilízase coa Copa do Rei
As 3.000 entradas dispoñibles para o partido están esgotadas
No estadio ultiman os preparativos para que o campo estea nas mellores condicións para o encontro
Negreira viste hoxe de vermello, e diso encárgase José, que apura o rotulado das últimas camisetas.
"Hoxe é o día que lle imos gañar a Real Sociedade".
A poucos metros, noutra tenda, están as camisetas oficiais que estrearán hoxe os xogadores.
"Hai moita ilusión". "Os nenos nos coles, non paran de falar do partido e din a ver se gañamos". "0-0 e a penaltis, confiamos nos porteiros", din varios seareiros.
A afección está preparada para animar o seu equipo, e no estadio unhas 50 persoas traballaron durante as últimas semanas na posta a punto do campo para recibir á Real Sociedade.
Nos sesenta anos de historia, o club que xoga na Preferente galega disputa hoxe o seu partido máis importante.
"Xogas contra un equipo de primeira división nunha competición oficial, como é Copa do Rei. Nunca pensamos en chegar a estes niveis", di Julián Ferreiro, presidente do Club.
"Van dar o 200 por cen, que gocen", di Carlos Berdullas, director deportivo do equipo.
Houbo que duplicar a capacidade das bancadas e instalar focos extra de luz. As tres mil entradas para o partido esgotáronse.
