25 anos da declaración da Muralla de Lugo como Patrimonio da Humanidade
Lugo celebra esta semana a efeméride do recoñecemento por parte da Unesco, o 30 de novembro do ano 2000
Decenas de persoas tiveron un papel destacado na conservación e promoción dun monumento senlleiro, o principal atractivo turístico da cidade e un orgullo para os lucenses
Arqueólogos, historiadores, arquitectos, políticos e artistas contribuíron nas últimas décadas á promoción da Muralla de Lugo e aínda marcan as directrices para o seu futuro.
A Xunta de Galicia aprobou o novo Plan de Conservación e posta en valor da Muralla. Ignacio López de Rego, foi o arquitecto partícipe no dosier enviado á Unesco e o actual director do Plan de Conservación do monumento, que incorpora a sostibilidade como eixo da xestión patrimonial.
"Buscamos o equilibrio entre a conservación do patrimonio monumental e do patrimonio medioambiental, a flora e fauna que habitan na Muralla. Entre as plantas que son prexudiciais e as que non, suprimindo as primeiras mediante biocidas como estamos facendo agora e engadirlle a problemática da fauna, cirrios, morcegos e réptiles".
En 25 anos avanzouse moito na preservación e coñecemento dun monumento que aínda garda segredos por desvelar, como algunha das portas ocultas. Apunta o historiador autor de varios libros e guías sobre a Muralla, Adolfo de Abel Vilela.
"Pode que algún día descubramos algunha desas portas orixinais que desapareceron ou se tapiaron".
"Unhas das cousas que se gañou foi a peonalización de parte da contorna da Muralla, gardando unha zona de respecto e afastando a circulación de automóbiles".
O recoñecemento da Unesco supuxo un aumento do turismo e unha maior apreciación do monumento por parte da veciñanza.
Os lucenses que pasean ou fan deporte polo adarve sinalan que "é un orgullo tela de pé" e "que é unha fonte de ingresos importante" polo turismo e "o bonita que é e o ben coidada que está". Tras dous mil anos "é unha marabilla conservala".
Alén do valor patrimonial a Unesco aprecia a integración da Muralla na cidade e na vida dos lucenses que destacan "o insólito de poder gozar hoxe da Muralla enteira" que é "unha protección para a cidade e un lugar de paseo".
Con 2.000 anos de historia e máis de dous quilómetros de percorrido a Muralla romana protexe a vella cidade que se abre aos visitantes a través das súas dez portas.
Para os turistas que visitan din que "é incrible que se manteña durante tantos anos" e afirman que Lugo encántalles e que "a Muralla é o máis impresionante" que viron.
Numerosas actividades conmemoran esta semana os 25 anos da declaración da Muralla de Lugo como Ben Mundial que culminarán cun grande acto institucional o día 30 de novembro.
