Jorquera non repetirá como candidato do BNG á alcaldía da Coruña en 2027

O portavoz municipal do BNG na Coruña, Francisco Jorquera, anunciou este mércores que non repetirá como candidato á alcaldía en 2027 e que o seu cargo queda á disposición do partido.

Nunha conferencia de prensa na Coruña, Jorquera revelou que non volverá liderar a lista do BNG -do que foi un dos fundadores- en 2027, aínda que non deixa a política e seguirá con "plena disposición a seguir contribuíndo e achegando".

A súa retirada prodúcese tras ser tamén deputado no Congreso e no Parlamento galego, ademais de senador. Preguntado polo seu futuro inmediato, dixo que a súa condición de portavoz do grupo municipal está "á disposición" do partido e debe ser este o que valore unha substitución inmediata ou posterior.

Sobre as posibles candidaturas, asegurou que calquera das persoas que o acompañan no grupo municipal -Avia Veira, Mercedes Queixas e David Soto- están "sobradamente preparadas" e teñen a mocidade necesaria para dar á cidade "o impulso" que necesita, polo que será o BNG quen decida en base a quen decida optar ao posto.

"Cremos que A Coruña necesita unha alternativa, e esa non é o Partido Popular, que é o retorno ao pasado, senón que é o BNG", defendeu. Respecto á súa traxectoria, dixo que empezou en política por "compromiso con este país e para conseguir unha transformación da sociedade" e que lle "horripila" o termo "clase política", pois cre que deben ser cidadáns comprometidos os que vexan esta opción como unha "ferramenta fundamental para cambiar as cousas".

Non cre que a súa retirada "sexa un caso de idadismo", aínda que indicou que nas eleccións locais de 2027 tería 66 anos, e, en calquera caso, asegurou que continuará como militante activo do nacionalismo galego. Jorquera estivo no Senado entre 2005 e 2008, foi portavoz do BNG no Congreso entre 2008 e 2012 e ocupou o mesmo cargo no Parlamento de Galicia entre 2012 e 2016, xusto antes que a actual líder, Ana Pontón.