A Fiscalía pide dez anos e medio de prisión para Rafa Mir por un delito de agresión sexual

A Fiscalía pide dez anos e medio de prisión para o futbolista Rafa Mir por un delito de agresión sexual agravado con acceso carnal e por outro de lesións, segundo asegurou este xoves o xornal Las Provincias. O diario detalla que o Ministerio Fiscal propón que Mir non poida achegarse durante trece anos a 500 metros da vítima, que teña despois sete anos de liberdade vixiada e oito de inhabilitación especial para exercer calquera actividade que teña relación con menores. Ademais, debería indemnizar a vítima con 64.000 euros.

En setembro de 2024, cando Mir xogaba no Valencia cedido polo Sevilla, foi detido tras ser denunciado por unha muller á que coñecera nunha discoteca e coa que foi á súa casa xunto cunha amiga dela e dous amigos do futbolista murciano.

Mir, que agora xoga no Elx cedido polo Sevilla, pasou case dous días detidos como presunto autor dun delito de agresión sexual con acceso carnal e outro de lesións. Ademais un dos seus amigos, o tamén futbolista Pablo Jara, foi denunciado pola outra muller. Tras a detención de Mir e a súa declaración no xulgado, onde negou os cargos e alegou que as relacións foron consentidas, o xogador quedou en liberdade provisoria e non se solicitou prisión preventiva por ningunha das partes.

O pasado mes de outubro de 2025 a titular da praza número 8 do Xulgado de Instrución de Llíria decidiu procesar a Mir e a Jara por senllos delitos de agresión sexual; no caso do primeiro, con acceso carnal e emprego de violencia. A xuíza entendeu que das dilixencias practicadas durante a instrución da causa desprendíanse indicios e non meras sospeitas que apuntan a que Mir agrediu sexualmente en dúas ocasións a muller que o denunciou e agora a Fiscalía pide dez anos e medio de prisión para o xogador.