Denunciados dous establecementos en Pontevedra e Mos por venda de pirotecnia sen autorización

A Garda Civil denunciou  dous establecementos, nos municipios de Pontevedra e Mos, pola venda de artigos pirotécnicos de categoría F1 e tronos de impacto sen autorizacións nin medidas de seguridade. Estas actuacións leváronse a cabo no marco das inspeccións realizadas polo Equipo de Inspección da Intervención de Armas e Explosivos da Comandancia da Garda Civil de Pontevedra.

Así, o pasado do 8 de maio levouse a cabo unha inspección nun establecemento de Pontevedra, onde se precintou e interveuse material pirotécnico de categoría F1: 1.153 unidades cun peso NEC (pólvora no seu interior) de 8,5 quilos.

Días despois, o 13 de maio, en Mos, localizouse tamén unha cantidade importante de material pirotécnico de categoría F1 e dos chamados tronos de impacto: en total, 7.686 unidades, cun peso total de case 43 quilos.

Por estes feitos, a Garda Civil denunciou aos establecementos, por comercialización de materias regulamentadas carecendo da documentación ou autorización requirida, pola omisión ou insuficiencia na adopción ou na eficacia das medidas de seguridade no almacenamento de materias regulamentadas, e a comercialización e almacenamento de material pirotécnico excedéndose dos límites autorizados.

Estas infraccións poden ser sancionadas con multas entre 601 e 30.000 euros, e implican a incautación e destrución do material aprehendido.