1.154 persoas morreron en accidentes de tráfico en 2024, 14 máis que o ano anterior

O ano 2024 pecha con 1.154 falecidos en accidentes de tráfico, segundo o balance de sinistralidade nas estradas feito público polo Ministerior do Interior. A cifra aumentou en 14 con respecto o ano anterior (1 %), nun contexto de incremento histórico de desprazamentos por estrada, case 463 millóns (un 3,15 % máis que en 2023).

Para Fernando Grande-Marlaska, "a cifra de 1.154 mortos é inasumible; nin debemos nin podemos aceptar que a mobilidade na estrada teña un prezo tan alto. Unha soa vida humana perdida nun sinistro viario é demasiado custo para unha sociedade moderna e avanzada como a española". 

O ministro puxo o acento naqueles condutores que no momento do accidente non fixeron uso dos elementos de seguridade, como o cinto ou o casco; "se os levasen, moitos deles salvarían a vida", dixo. "Non hai explicación para un comportamento tan irresponsable".

A sinistralidade durante 2024, en cifras

En total, durante o ano pasado, rexistráronse 1.040 sinistros mortais nas vías españolas, nos que faleceron 1.154 persoas e outras 4.634 quedaron feridas graves.

Dos 1.154 falecidos, 524 persoas viaxaban a bordo dun turismo, 79 en furgonetas (case o dobre que en 2023) 102 eran peóns, 46 ciclistas (1 máis que o ano anterior) e 300 conducían unha motocicleta ou un ciclomotor.

A cifra de vítimas mortais reduciuse entre o colectivo de condutores entre os 14 e 50 anos pero aumentou un 11 por cento entre os maiores de 65 anos. O ministro avoga por establecer limitacións a este colectivo, como prohibirlles circular de noite ou impedirlles a mobilidade a máis de 50 quilómetros do seu domicilio.

Restrinxir a mobilidade dos maiores de 65 anos e perseguir os grupos de WhatsApp que alertan de controis de tráfico

"Non imos prohibir a condución por motivos de idade pero si impoñer limitacións polas condicións físicas das persoas", dixo o ministro do Interior durante a presentación do balance de sinistralidade de 2024.

Con estas restricións -dixo- "permítese aos maiores de 65 anos conservar a súa autonomía para desprazarse en coche, pero en condicións de seguridade para eles mesmos e para o resto dos usuarios".

O ministro do Interior, Fernando Grande-Marlaska, animou os condutores a denunciar os grupos de WhatsApp que alertan da localización dos controis policiais de alcol e drogas, unha das condutas "máis irresponsables que podemos ter os cidadáns".

Segundo Marlaska, estase debatendo no Parlamento unha proposición de lei do Grupo Socialista que busca reformar a lei de tráfico e que contempla a redución da taxa de alcol do 0,25 actual aos 0,1 miligramos por litro de sangue e tamén sancionar condutas daqueles que alertan da existencia de controis de alcol.

A nova norma fixará a responsabilidade da infracción na persoa física que difunda o contido, aínda que se sirva para iso de plataformas ou servizos da sociedade da información ou se trate de redifusións con orixe noutros datos ou informacións de terceiros.