O CIS sitúa o PSOE 15 puntos por riba do PP, que perde o 3,9 % dos apoios

O Centro de Investigacións Sociolóxicas (CIS) amplía a 15 puntos a distancia entre o PSOE e o PP nunhas hipotéticas eleccións grazas á subida dos socialistas, que gañarían co 34,8 % do voto estimado, e ao esborralle dos populares, que quedarían nun 19,8 % con Vox cada vez máis preto.

A mostraxe, realizada a partir de 4.029 entrevistas realizadas entre o 1 e o 7 de outubro, concede ao partido de Santiago Abascal unha estimación de voto do 17,7 %, catro décimas máis que en setembro, mentres o PP perde 3,9 puntos e o PSOE gaña 2,1.

A porcentaxe que o CIS atribúe ao PP déixao por vez primeira nesta lexislatura por baixo dos 20 puntos de apoio electoral, e é a cifra máis baixa que obtería a formación liderada por Alberto Núñez Feijóo desde os últimos comicios. 

En cuarto lugar mantense Sumar, co 7,7 % (-0,2 puntos) seguido de Podemos, que logra o 4,9 % (+0,6 puntos); por detrás, os independentistas cataláns de ERC, que conseguen o 2 % (unha décima menos), e o partido de Alvise, Se acabó la fiesta, co 1,3 % (tres décimas menos).

Junts levaría o 1 % (+0,2), a mesma estimación que EH-Bildu, que baixa unha décima, en tanto que o PNV sobe tres décimas ata o 0,9 % e o BNG perde unha décima e sitúase no 0,8 %.

Coalición Canaria e UPN conservan a súa estimación de voto do 0,1 %, segundo o mesmo barómetro de outubro.

Sánchez, o máis valorado

En canto aos principais líderes, o líder do PSOE, Pedro Sánchez, é o preferido polos cidadáns para ser presidente do Goberno, segundo o 26,4 % dos entrevistados (24,8 % en setembro), en tanto que o líder do PP, Alberto Núñez Feijóo, segue superado por Santiago Abascal, xa que o de Vox é o favorito para o 10 % e o xefe da oposición, para o 8,4 %.

En nota media, ningún aproba aínda que Sánchez mellora lixeiramente e logra un 4,44; Abascal segue coa peor nota (2,89) e Feijóo queda cun 3,46. A vicepresidenta segunda e ministra de Traballo Economía Social, Yolanda Díaz, consegue un 4,24, a segunda mellor nota tras o xefe do Executivo.

Iso si, a desconfianza cara aos principais líderes é maioritaria posto que o 67,1 % desconfía de Pedro Sánchez e o 83,7 % de Alberto Núñez Feijóo. Á vez, só o 31,7 % confía no presidente e o 15,1 % no líder do PP.

A vivenda, o principal problema para a maioría dos españois

A vivenda consolídase como principal preocupación dos españois e sobe ata o 37,1 % de mencións na enquisa, seguida da inmigración (20,5 %) e os problemas relacionados coa calidade do emprego (18,3 %).

Ademais, o 54,2 % considera que a situación económica de España é "mala" ou "moi mala", pero o 66 % di que a súa persoal é "boa" ou "moi boa".