UUAA: "O Mercosur non debera traer grandes riscos e si oportunidades para Galicia"

O secretario xeral de UUAA ve como unha "oportunidade" para Galicia o acordo subscrito entre a UE e o Mercosur. Segundo Roberto García, esta alianza nace en resposta á inestabilidade que atravesa o mercado agrario mundial, como consecuencia das políticas arancelarias e dos vetos comerciais, especialmente por parte de China.

Nunha entrevista no Bos días da Televisión de Galicia, García lembrou que, na actualidade, o noso país depende en gran medida do abastecemento de materias primas para alimentación animal procedentes dos países do Mercosur, que supoñen arredor do 70 % do total.

O acordo permitiría importar 3,5 millóns de toneladas de grao e soia, cun valor estimado de 750 millóns de euros, a prezos estables e non suxeitos ás oscilacións políticas internacionais e a "como se levante ese día Trump".

“É normal que estes cambios xeren dúbidas e medos, pero cando analizamos os números en detalle, o único que pode traer para Galicia son máis oportunidades que riscos”, sinalou.

García salienta as garantías, que contempla o acordo, que limitará as cantidades de produtos do Mercosur que poderán entrar na Unión Europea.

No caso do vacún de carne, afirma, a cantidade autorizada sería pequena -mesmo inferior á que xa estaba entrando nos últimos anos- e parte dela sería conxelada. Ademais, no caso de que se producise un impacto negativo nos prezos ou no volume de mercado, o acordo contempla cláusulas de salvagarda que permitirían actuar nun prazo de 21 días.

Un observatorio galego de prezos para evitar competencia desleal

Desde UUAA salientan a creación dun observatorio permanente de control de produtos importados en Galicia acordado coa Xunta. O obxectivo é evitar competencia desleal e garantir que, se se detecta unha concentración excesiva de importacións, se poida actuar de inmediato e non cando o dano xa sexa irreversible.

Tamén se reforzará a identificación da orixe dos produtos, co fin de que os consumidores saiban claramente de onde procede o que consomen. 

A verdadeira preocupación: a PAC a partir de 2028

Máis aló do acordo comercial, o secretario xeral de UUAA sinala que a principal incerteza está na futura reforma da PAC, que apunta a unha posible redución do 20 % no volume orzamentario a partir de 2028, así como cambios nas axudas destinadas á modernización.

"O preocupante é o papel da política agraria comunitaria para garantir as rendas dos gandeiros", afirma, porque "historicamente, a renda dos gandeiros galegos dependeu en gran medida das axudas comunitarias, xa que o mercado apenas cobre os custos de produción".

Con todo, García apela á prudencia. Lembra que aínda quedan dous anos de negociación e que os acordos europeos “sempre se pechan o último día e á última hora”. Por iso, asegura que aínda hai tempo suficiente para defender os intereses do agro galego e dar a batalla en Bruxelas.