Os novos ataques sobre Gaza deixan xa un cento de mortos

O Exército israelí informou de que, tras expirar a tregua á 7:00 hora local e renovar as hostilidades, atacou uns "200 obxectivos terroristas" de Hamas na Franxa de Gaza, onde os bombardeos mataron un cento de persoas, segundo o Ministerio de Sanidade gazatí.

"Tras a violación da pausa operativa por parte de Hamas, nas últimas horas forzas terrestres, aéreas e navais atacaron obxectivos terroristas no norte e o sur da Franxa de Gaza, incluídos Jan Yunis e Rafah", indicou un comunicado militar israelí, que confirma a ampliación dos combates ao sur do enclave nesta nova fase da guerra.

O Exército hebreo detallou que atacou "zonas onde había trampas explosivas, túneles terroristas, postos de lanzamento e centros de mando operativo designados por Hamas para o seu uso nos renovados combates".

Mentres as alarmas por mísiles lanzados desde a Franxa soaron repetidamente hoxe nas comunidades israelís fronteirizas, a maioría evacuadas; lanzamentos que foron reivindicados por diferentes milicias de Gaza, incluídas as Brigadas al Qasam, brazo armado de Hamas.

Estas tamén se atribuíron o lanzamento de "unha quenda de foguetes" cara á cidade de Ashod, a 40 quilómetros do enclave.

O Ministerio de Sanidade da Franxa de Gaza, controlado por Hamas, indicou que a "agresión israelí" desde a fin da tregua pola mañá causou 109 mortos e centenares de feridos.

Mentres Israel prosegue a súa ofensiva terrestre no enclave, e estende os seus bombardeos á zona sur, o portavoz do Ministerio de Sanidade, Ashraf al Qudra, advertiu de que "a situación sanitaria en Gaza, particularmente no norte, é extremadamente catastrófica debido a que os principais hospitais están fóra de servizo".

O director da UNRWA (Axencia da ONU para os refuxiados palestinos), Philippe Lazzarini, advertiu de que a poboación de Gaza "pronto comezará a morrer por mor de enfermidades" e non só polos bombardeos de Israel.

Detida a entrada de axuda humanitaria

A entrada de axuda humanitaria á Franxa de Gaza a través de Rafah, que une o enclave palestino con Exipto, viuse paralizada este venres ante a continuación das operacións militares de Israel tras expirar a tregua, informou a televisión estatal exipcia Al Qahera News.

Segundo a cadea, "o movemento dos camións detívose" no paso de Rafah, o único cruzamento por onde entrou axuda humanitaria a Gaza desde o inicio da guerra o pasado 7 de outubro, e por onde ingresaron ao enclave uns 200 vehículos a diario durante os sete días que durou a tregua.

Así mesmo, indicou que os convois, camións cisterna con combustible e algunhas ambulancias están a esperar ao "resultado da coordinación" entre Exipto e as organizacións humanitarias que reciben a axuda desde o lado palestino do cruzamento.

Pola súa banda, fontes humanitarias en Rafah consultadas por EFE confirmaron que, ata o momento, non entraron camións de axuda humanitaria a Gaza durante a mañá do venres, mentres que se descoñece se o paso foi pechado.