As tropas israelís atacan máis de 250 obxectivos en 24 horas na franxa de Gaza
As tropas israelís atacan máis de 250 obxectivos en 24 horas na franxa de Gaza
A ONU denuncia novos ataques contra instalacións humanitarias
![Unha das vítimas nos ataques de Jan Yunis](https://img-g24-crtvg.flumotion.com/prog24/2023/20231210/AFP-TV-20231210-RAW-PALESTINIANS-ISRAEL-VIDI347C9ML_EN.1920x1080_frame_4923.png)
O Exército israelí continúa coa súa ofensiva sobre Gaza, con ataques a "infraestruturas terroristas" do grupo islamita Hamás, no día 65 da guerra.
"Durante o último día, as forzas terrestres, aéreas e navais das FDI continuaron atacando infraestrutura terrorista na franxa de Gaza e alcanzando máis de 250 obxectivos", asegura un portavoz militar nun comunicado.
Segundo informa, "as tropas identificaron e atacaron células terroristas armadas" e destruíron túneles usados polas milicias.
Fontes israelís sosteñen que os combates poderían prolongarse aínda dous meses, pero con operacións máis selectivas e localizadas. Tamén falan de novos intentos de negociación dun alto o fogo temporal para conseguir a liberación de reféns.
Os ataques israelís na Franxa causaron polo menos 17.700 vítimas mortais confirmadas dende o inicio da guerra o 7 de outubro, tras un ataque por sorpresa de Hamás que deixou máis de 1.200 persoas mortas en Israel.
![](https://img-g24-crtvg.flumotion.com/prog24/2023/20231210/AFP-TV-20231210-1ST-IMAGES-PALESTINIANS-VIDI347F9LR_EN.1920x1080_frame_1649.png)
Bombardeos en hospitais
Nos dous últimos días o Exército israelí bombardeou nas proximidades do hospital Europeo de Jan Yunis, no sur de Gaza e un dos principais aínda en funcionamento na Franxa, segundo informa a ONU.
A organización internacional tamén dá conta doutros ataques contra instalacións humanitarias no territorio palestino, como os rexistrados no hospital Al Amal ou nas oficinas da Media Lúa Vermella que están preto.