O PP insiste en culpar a Marrocos da crise de Ceuta e rexeita as críticas de Rabat

O Partido Popular emitiu un comunicado respondendo ás críticas que lle lanzou Marrocos, no que reitera que este país é responsable por acción ou omisión da invasión sufrida por Ceuta.

Os populares advirten de que exercerán con firmeza a defensa da integridade de España e esixe respecto ás institucións e á investigación xudicial iniciada en España sobre este ataque á cidade autónoma.

É a resposta do PP ao comunicado emitido onte polo reino de Marrocos no que carga contra o partido presidido por Alberto Núñez Feijóo por acusalos da avalancha de 80.000 inmigrantes en Ceuta o pasado 30 de xullo e tamén contra a xuíz María Tardón, que está a investigar os feitos desde a Audiencia Nacional.

Nada está por riba da defensa de España

Un día despois da publicación dos informes do CNI, Policía e Garda Civil en relación cos sucesos de finais de xullo en Ceuta, o Ministerio de Exteriores marroquí aproveitou para cargar as tintas contra o PP, aínda que sen mencionalo expresamente, e tamén contra as institucións lexislativas e xudiciais por realizar iniciativas desafortunadas, en aparente alusión á aprobación no Congreso da lei que outorgará a nacionalidade aos saharauís e tamén á investigación xudicial iniciada pola xuíz María Tardón na Audiencia Nacional.

O PP fala dun ataque híbrido cunha instrumentalización da inmigración irregular e reitera na súa resposta que Marrocos é responsable do ocorrido por acción ou omisión, lembrando que ambos os países comparten fronteira e responsabilidade na súa xestión.

Piden que se faga unha avaliación rigorosa e inaprazable do ocorrido e esixen garantías verificables para que feitos similares non volvan producirse.

O PP advirte a Marrocos que exercerá con firmeza e por riba de calquera circunstancia a defensa dos intereses xerais da nación española, da integridade das fronteiras e da seguridade dos españois, xa que iso constitúe unha prioridade irrenunciable. "Nada está por riba da defensa de España", advertiron.

Con todo, reitera a vontade de manter unha relación leal e estable co Reino de Marrocos, aínda que deixando claro que Ceuta e Melilla son España.