Evacúan unha cidade de Islandia por risco de erupción volcánica

A Oficina de Meteoroloxía de Islandia informou hoxe de aproximadamente mil novos terremotos dende a pasada medianoite, preto da cidade de Grindavík, no suroeste da illa. Aínda que os tremores non superaron a magnitude 3, o perigo de erupción volcánica irá aumentando nos próximos días.

"Dende a mañá do 11 de novembro, a actividade sísmica na intrusión de magma mantense bastante constante. Dende a medianoite do 12 de novembro, rexistráronse ao redor de mil terremotos dentro dos límites do dique, todos eles de magnitude inferior a 3,0", segundo actualizaron hoxe. O dique está formado por intrusións de material volcánico, en estado líquido e que se solidifica nun proceso lento

"A maior actividade sísmica produciuse dende o centro do corredor cara ao norte e o sur, baixo Grindavík", precisan dende a Oficina de Meteoroloxía. Tamén anunciaron que "a maioría dos sismos teñen lugar a unha profundidade de entre tres e cinco quilómetros na parte inferior da intrusión de magma".

"As medicións GPS das últimas 24 horas mostran que a deformación asociada ao túnel de magma que se formou o venres 10 de novembro retardouse", o que quere dicir que "o magma se está movendo máis preto á superficie", agregan.

Risco de erupción volcánica

A Oficina Meteorolóxica de Islandia, a Universidade de Islandia e o Departamento de Protección Civil e Xestión de Emerxencias, concluíron nunha reunión este sábado, a partir das últimas medicións de sismicidade e deformación do terreo en Grindavík, que a intrusión en curso representa un grave perigo volcánico.

Esta intrusión, segundo os modelos xeofísicos, estímase que se está propagando lentamente cara arriba. Tamén se cre que o magma se atopa a 800 metros baixo a superficie. "Descoñécese a localización exacta dun posible lugar de erupción, pero a lonxitude de 15 quilómetros e a orientación do dique ofrecen unha boa indicación de posibles fontes", engade o comunicado.

As autoridades islandesas declararon este venres a situación de emerxencia tras unha serie de terremotos preto de Grindavík e advertiron dunha posible erupción volcánica. Como medida preventiva, ordenaron a evacuación desta cidade, que se sitúa a 50 quilómetros da capital, Reikiavik.