Desconvocada a folga de Renfe deste venres
Desconvocada a folga de Renfe deste venres
A mobilización suspendeuse tras chegaren a un acordo os sindicatos co Ministerio de Transportes
![](https://img-g24-crtvg.flumotion.com/prog24/2023/20231123/AFECTACIONTRENSFOLGADOVENRESEATRASOS_frame_799.png)
Os sindicatos desconvocaron a folga en Renfe e no Adif que debía empezar este venres e pola que se ían suspender uns 1.550 trens no conxunto de España. En Galicia ían ser 38 os trens afectados.
Á mobilización estaban chamados uns 15.000 traballadores. Finalmente a folga suspendeuse tras alcanzaren un acordo os sindicatos co Ministerio de Transportes.
Segundo fontes sindicais, o ministerio garante a integridade das dúas empresas, o mantemento do persoal e que as xestións para o traspaso a Cataluña de Rodalies e para dar entrada a unha compañía privada en Renfe Mercadorías serán levadas a cabo por persoal da compañía pública.
En calquera caso, os sindicatos advirten de que se manterán vixiantes para garantir que se cumpre todo o acordado e aseguran que, de non ser así, volverán convocar novas xornadas de folga.