"A nova Lei de igualdade é pioneira para seguir traballando no ámbito da violencia sobre as mulleres"

52 mulleres morreron en España no que levamos de 2023 pola violencia machista, dúas delas en Galicia. Son as cifras máis evidentes e máis duras desta eiva, pero non a única maneira que ten de manifestarse: vexacións, insultos, maltrato físico e psicolóxico, agresións sexuais, e tamén novas formas de violencia de xénero que traen as novas tecnoloxías. Comportamentos que ademais se reproducen cada vez a unha idade máis temperá.

Este sábado, 25 de novembro, é o Día Internacional para a Eliminación da Violencia contra as Mulleres, e a secretaria xeral de Igualdade da Xunta de Galicia, Sandra Vázquez, estivo no estudio do Bos días, onde asegurou que "o compromiso do Goberno galego é seguir actuando para eliminar as diferentes formas de violencia como poden ser a económica, a psicolóxica, a social, incluso a dixital no ámbito máis xuvenil".

"A aprobación efectiva da Lei de igualdade entre mulleres e homes esta mesma semana no Parlamento é un fito importante, sendo unha lei pioneira para seguir traballando no ámbito sobre todo desa violencia sobre as mulleres e tamén seguir avanzando na igualdade e na prevención deses casos", di Sandra Vázquez.

Un dos ámbitos nos que se quere traballar é o da prevención e sensibilización, e "mañá queremos desde o Goberno galego, -di a directora xeral-, a través dun acto que vai ter lugar no castelo de Soutomaior, falar diso no ámbito educativo, no ámbito sanitario, a través dos centros de información á muller, que son os máis próximos á sociedade, e tamén a través das forzas e corpos de seguridade do Estado, e tamén desde o ámbito dos medios de comunicación".

En paralelo, este domingo celébrase en Santiago a décimo primeira andaina de Camiño ao respecto, "á que cada vez se suman máis persoas desde todos os ámbitos, de maneira física, nese percorrido de cinco quilómetros desde o Monte do Gozo ata a praza do Obradoiro, ou de maneira dixital", explica Vázquez.

Desde a Xunta defenden que "con iniciativas, con apoio económico, con medidas que ten implantado o Goberno galego e que foron pioneiras, e que están a ser pioneiras, como é a axuda periódica para as mulleres ou o apoio psicolóxico ou xurídico son medidas que, a través desta lei que recentemente se aprobou, debemos seguir traballando para eliminar esta lacra. Con estas cousas estamos a previr ou a crear sensibilización".

Sandra Vázquez destaca o incremento do orzamento para estas políticas de cara ao próximo ano: "Só no que se refire á área de violencia de xénero, un 14,48 % máis, alcanzando os 23,5 millóns de euros. E o compromiso é seguir poñendo todas as políticas necesarias para loitar contra a violencia de xénero. Por unha banda, co tema económico, con ese orzamento, pero tamén nos últimos 14 anos demos acubillo a máis de 3.500 mulleres, no que ten que ver coa axuda periódica, ou no apoio psicolóxico ou xurídico que poden precisar as vítimas de violencia de xénero".

Nos próximos anos o reto será combater novas formas de violencia e chegar aos ámbitos nos que se manifesta e aos que aínda non se puido acceder. "A lei, a parte de ser unha lei pioneira que foi consensuada polo tecido asociativo, permite combater novas formas de discriminación e tamén eses contornos que sexan perigosos para as mulleres", explica Sandra Vázquez.

Nese camiño, conclúe a directora xeral, "para Galicia é un paso importante que a violencia dixital sexa recollida como violencia de xénero. Evidentemente, é un avance como sociedade pero debemos seguir traballando no ámbito educativo. Faise de maneira transversal coa Consellería de Educación. Intentamos explicar aos nosos menores como deben traballar no ámbito da igualdade e como debemos trasladar esa tolerancia".