XXXI Festa do Melindre e da Repostería Tradicional en Melide: os 'ricos' gañan adeptos
XXXI Festa do Melindre e da Repostería Tradicional en Melide: os 'ricos' gañan adeptos
A alza das materias primas apenas vai repercutir este ano no prezo dos doces
A festa serve de escaparate e de promoción dos produtos e da vila durante todo o ano
Os fornos das pastelerías de Melide levan unha semana sen parar, cocendo quilos e máis quilos de melindres, amendoados e ricos, os tres protagonistas da festa gastronómica desta terra doce.
Alberto Rodríguez, presidente da Asociación de reposteiros Melide Terra Doce cóntanos que os ricos gañan adeptos ano tras ano.
"O rico é o gran segredo de Melide, móveste dez km e desaparece tanto en sabor como en formato. De anos para aquí, vai gañando adeptos a puñados".
A receita remóntase, polo menos, ata o medievo e séguense a facer igual cos mesmos ingredientes ca daquela: azucre, ovos, améndoa, manteiga e fariña. Todo natural como confirma Alberto Rodríguez, á fronte do obradoiro da pastelería Estilo.
"Non hai conservantes, non hai aditivos nin mellorantes. Produtos moi humildes que saen das receitas das nosas avoas. O ano pasado gastamos 7.000 ovos só no noso obradoiro".
Canto aos prezos, tamén nos confirma que nesta edición número trinta e unha, a suba das materias primas apenas se vai notar no prezo final respecto ao do ano pasado.
Con máis de quince mil visitantes antes da pandemia, a festa é un grande escaparate do que fan a dirario os reposteiros melidenses e promociónaos durante todo o ano, sobre todo, no Camiño de Santiago, di Alberto, a rúa máis grande de Europa.
A veciñanza de Melide xa ten ganas da festa e as vendas levan bo ritmo toda a semana.
Esta tarde xa estaba todo preparado na Praza e na rúa do Convento e no cantón de San Roque, para a apertada axenda da festa que comezará ás dez da mañá do sábado.
