Xulgan seis persoas por traficar con droga desde unha tenda de plantas da Coruña

O encargado do negocio é o que se enfronta a unha condena maior, de ata dez anos en prisión. Admitiu na sala que na primavera de 2021, ante a perda de clientes provocada pola pandemia, comezou a traficar con haxix en colaboración cos seus empregados e algúns coñecidos. Con todo, manifestou que o resto das drogas atopadas no rexistro policial ao seu domicilio, cocaína marihuana, éxtase e anfetaminas, eran para o seu consumo persoal e o da que era daquela súa parella, que tamén recoñeceu os feitos polos que se solicitan para ela sete anos de cárcere.

A maiores, a Fiscalía pide para cada un deles a maiores unha multa dun millón de euros. Ambos están a día de hoxe en tratamento de desintoxicación. 

O outro individuo sinalado polos investigadores como o segundo líder da banda almacenaba no seu domicilio importantes cantidades de droga, pero el movía só pequenas doses e dixo que eran outros dous acusados os que lle traían e despois traficaban coa meirande parte das substancias atopadas na casa polos axentes.

O seu avogado puxo de manifesto que no momento do rexistro tan só se localizaron 300 euros, polo que dificilmente podía estar á fronte do negocio. Con todo a Fiscalía pídelle 8 anos de prisión.

Ademais deses outros dous cómplices que admitiron igualmente a súa participación activa na rede de tráfico de drogas, o sexto investigado era un empregado da tenda de plantas. Tamén no seu domicilio localizouse marihuana e haxix e tamén el recoñeceu que comerciou con esas substancias cando o outro negocio entrou en crise.