Xornada de moita calor e treboadas no interior de Galicia

Aínda que sempre esaxera, o termómetro do parque ourensán de San Lázaro danos unha pista da tarde de calor que fixo este venres en Ourense.

"Hoxe é o día máis caloroso con diferencia". "Onte tamén lle chegou ben. Pero mellor así, que xa estamos fartos de chuvia. Que non veña a tormenta", comentan dúas ourensás.

Ás cinco da tarde rexistrábanse preto de 32 graos en Ourense, un máis en Leiro. Toda a conca ourensá do Miño subiu dos 30 graos. Temperaturas que animan a buscar o fresco, no caso de Ourense a carón do río.

"As piscinas aínda non abriron, pero o río dá fresquiño", di un veciño de Ourense.

Mesmo houbo quen se atreveu co primeiro baño da temporada nunhas augas, as do Miño, aínda frescas. Tamén se animaron as praias, aínda que con temperaturas bastante máis frescas ca no interior.

"Hai un pouco de brisa, pero aquí hai que aproveitar cada día que sae o sol", di unha muller na praia de Samil.

Treboadas

Os termómetros comezaron a baixar a partir de media tarde polas treboadas, que descargaron con forza nalgúns puntos, como podemos ver nestas imaxes recollidas en Leiro e mesmo acompañadas de pedrazo, como esta gravada no Carballiño.