Xinzo recrea a festa das vestais, unha das celebracións máis populares da antiga Roma

Xinzo acolleu este sábado a II Concentración Nacional de Vestais, coa participación de representantes da vila ourensá e outras procedentes de Mérida e de Astorga.

A festa empezou cun desfile das vestais ata a Praza Maior que se converteu nun templo vivo. A través das representacións teatrais explicouse a  importancia das sacerdotisas na antiga Roma e houbo espectáculos de danzas e ofrendas simbólicas.

As vestalias forman parte da programación previa á Festa do Esquecemento que este agosto fai 25 anos.