Xa á venda nas farmacias os tests combinados de autodiagnóstico de covid e gripe

Detectan tanto a gripe como o coronavirus. Son os últimos tests en chegar ao mercado. Funcionan como os de antíxenos e xa están á venda nalgunhas farmacias galegas, de momento con pouca demanda, porque moita xente non sabe aínda da súa existencia, ao que se suma a escasa incidencia da covid na actualidade e que a temporada de gripe aínda non comezou.

Con todo, en función de como avance a situación epidemiolóxica, realizar esta proba pode ser moi útil, sobre todo para saber que precaucións hai que tomar en caso de dar positivo nunha ou noutra infección.

A realización do test, tal e como explica a farmacéutica de Santiago Verónica Vales, é igual de sinxela que as probas de antíxenos que a práctica totalidade da poboación tivo que realizar nalgún momento da pandemia de coronavirus, pero cunha dobre utilidade, mesmo tripla, porque estes tests diferencian entre a gripe A e B. 

Haberá que esperar ao tempo propio da gripe, xa máis entrado outubro, porque algúns epidemiólogos cren que este ano, tras o levantamento das restricións, podería ter maior incidencia que os pasados, e a similitude dos síntomas pode levar a confusión.

O prezo, ademais, está regulado, así que é o mesmo que o da proba única da covid: 2,94 euros.