A feira Conxemar de Vigo rolda os 850 millóns de volume de negocio
800 expositores de 50 países presentaron en Conxemar as últimas novidades do sector, que aposta por atraer aos consumidores máis novos
Unha feira pola que pasaron 30.000 persoas, e que agarda superar os 847 millóns de euros de volume de negocio que conseguiu o ano pasado
As reunións e as apertas de mans en Conxemar son o paso previo a pechar acordos comerciais. Durante tres días Vigo convértese cada ano no centro do mundo do peixe conxelado. Nesta edición, aumentou o número de expositores, que ascende a uns 800, chegados de preto de 50 países. Algúns como Cabo Verde ou Corea contan por primeira vez con pavillón propio no recinto feiral de Vigo
Son moitas as empresas que presentan aquí os seus produtos máis innovadores, en boa parte enfocados en atraer o público máis novo, o que consome menos peixe. A defensa da calidade dos produtos do mar é outro dos piares desta feira. Como novidade nesta edición tamén se habilitaron espazos para reunións e contactos entre empresas e clientes e showcookigs para demostrar a versatilidade dalgúns produtos.
Este ano conseguiron bater a súa propia marca histórica de visitantes nos tres días de feira, achegándose xa aos 30.000. Tamén agardan superar o volume de negocio acadado o ano pasado, que ascendeu a 847 millóns de euros.
