Vehículos implicados en crimes e delitos, baixo custodia no depósito municipal de Santiago

Polo depósito municipal de vehículos de Santiago pasan cousa de dous mil vehículos cada ano. Case todos chegan no guindastre por estaren mal aparcados, e marchan nun ou dous días. Pero os que teñen máis historia detrás son outros inquilinos, de longa estancia e pasado escuro.

"Temos vehículos que chegan pola comisión dun delito, por condución temeraria, comisados por tráfico de drogas ou polo delito que sexa, e acaban aquí", conta José Ramón Mosquera, xerente de Tussa, a empresa municipal responsable do depósito. "Temos casos mesmo de cando o vehículo foi un medio para un homicidio, son probas dese delito", engade.

Cando o vehículo é a propia arma do crime. No depósito compostelán está o coche que matou un home en Conxo en outubro de 2023, nun suposto atropelo intencionado. Ou o que interveu nunha lea multitudinaria en Ribeira en xullo. Custódianse no depósito como proba do delito, unha vez que os investigadores remataron o seu traballo.  

"Quedan precintados e, xeralmente, durante os primeiros meses acode a Policía Nacional ou a Local para continuar coas súas investigacións -di Mosquera-. Despois o vehículo queda aquí ata que o xulgado entenda que xa está liberado desa investigación".

Así que explica que o normal é que pasen anos -mesmo décadas- custodiados no depósito. "Pode haber coches de 2004, de 2005, que aínda están en procesos xudiciais vivos e que non podemos enaxenalos" explica Mosquera. E sinala que tamén hai "algunha moto de gran cilindrada, comisada nalgunha investigación".

O xulgado dirá se hai que devolvelos ao propietario, se van a poxa pública, ou se eses vehículos, como os que se abandonan, acabarán no ciclo de reciclaxe como residuos sólidos urbanos.