Dinamarca cualifica de ataque híbrido o incidente con drons sobre varios aeroportos
"Non parece unha casualidade, senón algo sistemático. Non podemos dicir con seguridade quen está detrás, pero todo apunta a un actor profesional", dixo en conferencia de prensa o ministro de Defensa danés, Troels Lund Poulsen
Reuters
O Goberno danés cualificou este xoves de ataque híbrido sistemático o voo onte á noite e esta madrugada de varios drons sobre aeródromos e instalacións militares deste país nórdico, días despois dun incidente similar que obrigou a pechar unhas horas o aeroporto de Copenhague.
"Non parece unha casualidade, senón algo sistemático. Non podemos dicir con seguridade quen está detrás, pero todo apunta a un actor profesional e a un ataque híbrido con distintos tipos de drons lanzados de forma simultánea", dixo en conferencia de prensa o ministro de Defensa danés, Troels Lund Poulsen.
Poulsen resaltou non obstante que non hai ningunha ameaza militar directa contra Dinamarca e aínda que reiterou que non se pode establecer ningunha conexión directa con Rusia, mencionou que hai países ou actores que poden ter interese en que se reduza o apoio a Ucraína.
"O obxectivo destes ataques é crear medo e división na poboación", afirmou o ministro de Xustiza, Peter Hummelgaard, quen resaltou que as autoridades os toman moi en serio.
Hummelgaard revelou que o Goberno impulsará a compra de novas capacidades para detectar e neutralizar drons.
Varios drons foron observados nos aeroportos de Aalborg, cuxo espazo aéreo tivo que ser pechado e onde dous voos foron desviados a outros aeroportos, Esbjerg e Sønderborg, e tamén na base aérea de Skrydstrup, informou a policía danesa.
O primeiro dron foi visto no espazo aéreo próximo ao aeroporto de Aalborg, a cuarta cidade danesa, no norte do país, ás 21:44 hora local o mércores, e o último sobre as 00:54 hora local do xoves.
A policía recibiu varios avisos de actividade de drons nos aeródromos rexionais de Esbjerg e Sønderborg, e en Skrydstrup, e tamén se observaron drons sobrevoando o norte de Esbjerg pouco antes da 22:00 hora local.
Os drons voaban con luces e foron observados desde terra, pero aínda non se aclarou que tipo de drons son.
As autoridades danesas resaltaron que se fixo unha análise de risco sobre o posible derrubamento dos drons.
"Fíxose unha estimación conxunta", dixo o xefe do Estado maior, Michael Hyldgaard, quen aludiu á seguridade dos cidadáns.
Trátase do segundo albiscamento de drons sobre aeroportos daneses desde a noite do 22 ao 23 de setembro.
Os aeroportos de Kastrup (Copenhague) e de Gardermoen (Oslo) permaneceron pechados ao tráfico durante varias horas, aínda que no caso do segundo, as autoridades norueguesas de momento non estableceron con seguridade se realmente se trataba de drons.
A primeira ministra danesa, Mette Fredriksen, cualificou entón de ataque grave á infraestrutura deste país nórdico o ocorrido.
O inspector da policía de Copenhague, Jens Jespersen, dixo entón pola súa banda: "O modo de operar, o tamaño e o tempo sobre o obxectivo fixeron que concluamos que probablemente haxa un actor capacitado detrás do uso dos drons", sen vinculalo con Rusia.
