Unha tripla na última décima mantén a vantaxe de campo para o Obradoiro no 'play off'
O equipo santiagués chegou a perder por 26 no primeiro tempo e remontou (100-102) cunha incrible canastra de Barcello
Remata a temporada para o COB Ourense logo de perder en Guipúscoa
Incrible o desenlace da fase regular da Primeira FEB co Obradoiro mantendo a vantaxe de campo no play off diante de Palencia grazas a unha tripla de Barcello na última décima de segundo en Burgos (100-102). Co triunfo de Palencia só lle valía a vitoria ao cadro obradoirista que fixo un primeiro cuarto nefasto (32-10) e chegou a ir perdendo por 26 puntos no segundo. Ao descanso o resultado era de 63-40.
⏱️ Quedaban 0'7 segundos
— En Xogo tvG2 (@EnXogo_tvG2) May 9, 2025
🔥 A incrible canastra de Barcello que lle dá vantaxe de campo ao @OBRADOIROCAB para a eliminatoria de ascenso á @ACBCOM contra o @PalenciaBasket https://t.co/AmztBMtlw4
Todo mudou no segundo tempo no que o Obradoiro conseguiu recuperarse no terceiro cuarto (79-67) e púxose por diante por primeira vez no partido a tres minutos do final (89-90). As alternativas sucedéronse neses últimos minutos. O Tizona parecía ter a vitoria na man cando Jones anotou unha canastra a un segundo do remate. Pero na última xogada Barcello sacou unha tripla imposible para darlle a vitoria fundamental para superar a eliminatoria de cuartos
Remata a temporada para o COB
Unha vitoria do Obradoiro abríalle a porta do play off ao Aircargobooking Ourense pero tiña que gañar na pista do Guipúzkoa que tamén se xogaba entrar entre os nove mellores. O partido foi moi igualado (49-44 ao descanso). O Ourense tivo opcións ata o último cuarto (75-74 a 5 minutos do final) pero acabou perdendo por 87-78.
